YousifMind

هلا حياتي اشلونج اليوم ؟ اشلون الجامعه ؟ شنو ؟ شقاعد تقولين انتي .. زين فهميني!

طوط طوط طوط انتهت المكالمه ..

كنت خايف .. مادري شسوي .. ليش ماتبيني ادق عليها مره ثانيه ؟

“يوصل مسج “

” خالد .. انا خلاص بتزوج .. الله يخليك لاتدق “

بلا شعور دقيت عليها .. ماردت .. استمريت بالمحاوله .. ماكو نتيجة ..

طلعت من الجامعه و سكبت كلاساتي .. رحت البيت .. دخلت غرفتي وقفلتها

قعدت ..

احاول استوعب شنو الي قاعد يصير .. هذي اول حب احبه بحياتي صادق .. بدون منافع جنسيه

كان قصدي زواج والله ..

نزلت دمعه من خدي من حرارتها صرخت ..

——-

مرت 5 سنين على هالحادثه .. وانا مو قادر انسى ولو لساعه الغدر الي حسيت فيه

كل يوم اراجع نفسي .. سويت شي غلط ؟ انا شفيني ؟ شنو ناقصني ؟ ليش انتهت علاقتنا بهالشكل

حب سنتين مو شويه .. مشتاق اسمع صوتها .. مشتاق لعيونها لما تضحك .. مشتاق …

هل صار فيني هالشيء لأن خدعت بنات وايد بحياتي ؟ وفتحت لهم بوابة الخراب على ايدي ؟

كنت افكر بهالافكار وانا بالسوق .. إي بالسوق وانا هذا تفكيري .. لهالدرجه صرت مينون !!

دعمني ياهل وطاح .. ضحكت وقلت له دير بالك حبيبي امش شوي شوي

حط عينه بعيني وركض وهو يقول .. ماما ماما ..

رفعت عيوني .. وانصدمت .. شعر جسمي وقف .. حسيت بحرارة .. عرق جسمي كله ..

الولد كان يحاول يلفت انتباهها .. مو قادر .. الام كانت تشوفني بذهول .. جنها شايفه شبح

حسيت اني وياها وحيدين بالسوق .. ظلمت الدنيا كلها بويهي ..

خ..ا..لد ؟

انا : خلود ؟

خلود : (ضحكت بشهقه سعاده ) خالد اشلونك !

انا : …..

خلود : اشفيك ماتتحجى .. انا خلود

خالد : ….

خلود : انا لازم امشي الحين .. ريلي ناطرني برى .. هاك رقمي لازم تدق علي ضروري ضروري ضروري

عطيتها تلفوني وكتبت رقمها وردته بايدي ..

خلود : لاتنسى اوكي ؟

خالد : ….

وقفت ساكت .. مادري شنو اسوي ! .. احس جسمي خدران .. احس بطيح .. رحت عند الطوفه وتسندت عليها

حاولت استوعب الي صار مو قادر .. طلعت تلفوني عشان اتأكد ان الي صار صج و مو حلم يقظه

لقيت رقمها !!

نسيت شنو ابي اشتري من السوق .. طلعت .. ماهمني اصلا شنو الي كنت بشتريه .. ركبت سيارتي .. دقيت سلف

رحت البيت .. انسدحت عالفراش .. مخي بينفجر .. قلبي احس بينقز من صدري من قوة دقاته